‘నా భార్య చనిపోయింది.. ఓ తోడు కావాలి’.. చీరాల వృద్ధుడి వీడియో వైరల్.. మలి సంధ్యలో మగాడి కష్టం ఇది..!

‘నా భార్య చనిపోయింది.. ఓ తోడు కావాలి’.. చీరాల వృద్ధుడి వీడియో వైరల్.. మలి సంధ్యలో మగాడి కష్టం ఇది..!

వృద్ధాప్యంలో భాగస్వామి దూరమై.. ఒంటరిగా జీవించటం.. మాటల్లో వర్ణించలేని నరకం. ఇలాంటి సమస్యతో మనముందరే ఎంతో మంది బాధపడుతున్నారు. ఈ వయసులో తోడూనీడగా ఉండే వ్యక్తి దూరమై.. బాగోగులు చెప్పుకోలేక, భావాలను పంచుకోలేక వారు పడే ఇబ్బందులు అనేకం. తోడు కావాలని మనసు కోరుతున్నా.. సమాజం ఏమంటుందో అనే భయాలతో వెనకడుగు వేసేవారే ఎక్కువ. కానీ ఓ పెద్దాయన చేసిన ప్రయత్నం ఇప్పుడు అలాంటి వారిలో ధైర్యం నింపుతోంది. తన భార్య చనిపోయిందని.. తనకు తోడునీడలా ఉండేందుకు భార్య కావాలంటూ చీరాల వద్ద ఉన్న స్వర్ణ గ్రామానికి చెందిన నీరుకట్ల నారాయణ అనే వ్యక్తి సోషల్ మీడియాలో పోస్ట్ చేసిన వీడియో ఇప్పుడు నెట్టింట వైరల్ అవుతోంది.

Chirala old man wants wife share video

భార్య కావాలని వీడియో షేర్ చేసిన చీరాల వ్యక్తి

దాంపత్యమంటే.. భార్యాభర్తల మధ్య అన్యోన్యత, నమ్మకం, ప్రేమ.. అంతకుమించి పరస్పర అవగాహనతో కూడిన ఓ బంధం. ఏడు అడుగులతో మొదలైన ఈ బంధం.. ఏడు జన్మలూ తోడుండాలని దంపతులు కోరుకుంటూ ఉంటారు. అయితే కాలం కొన్ని జంటలను అనుకోకుండా విడదీస్తూ ఉంటుంది.. ఒంటరి పక్షులను చేస్తుంది.. ఇన్నేళ్లు తనతో కలిసి నడిచిన తోడు దూరమై.. మలి సంధ్యలో ఒంటరి ప్రయాణం చేయడం ఎవరికైనా ఇబ్బందే. జీవిత చరమాంకంలో వారికి కావాల్సిందే తోడు. ఒకరికి ఒకరు తోడూనీడలా ఉంటూ.. జీవన ప్రయాణానికి మంచి ముగింపు ఇవ్వాలని అందరూ కోరుకుంటారు. జీవితం చివరి దశలో భార్య ముందు చనిపోతే.. భర్త పడే వేదన అంతా ఇంతా కాదు. అలాంటి ఓ వ్యక్తి.. సోషల్ మీడియాలో పోస్ట్ చేసిన ఓ వీడియో వైరల్ అవుతోంది.

బాపట్ల జిల్లా చీరాల సమీపంలోని స్వర్ణ గ్రామానికి చెందిన నారాయణ భార్య ఐదేళ్ల కిందట కాలం చేశారు. నారాయణకు ఇద్దరు కొడుకులు కాగా.. వారి బతుకులు వారు బతుకుతున్నారు. జీవిత చరమాంకంలో భార్య దూరమై ఇబ్బందులు పడుతున్న నారాయణ.. తన సమస్యకు సోషల్ మీడియాలో పరిష్కారం వెతుక్కునే ప్రయత్నం చేశారు. తన భార్య చనిపోయిందని.. 45 నుంచి 50 ఏళ్లలోపువారు ఎవరైనా తనకు భార్యగా ఉంటూ, ఇంటి పనులు, వంటపనులు చేసి పెడితే.. వారి బాగోగులు చూసుకుంటానంటూ నారాయణ సోషల్ మీడియాలో ఓ సెల్ఫీ వీడియోను పోస్ట్ చేశారు. తన ప్రతిపాదన నచ్చిన వాళ్లు తనను సంప్రదించాలని ఫోన్ నంబర్ కూడా పంచుకున్నారు. ఇందుకోసం సోషల్ మీడియాలో అకౌంట్ క్రియేట్ చేయటం విశేషం.

“నా పేరు నీరుకట్ల నారాయణ . మాది స్వర్ణ గ్రామం . చీరాల దగ్గర ఉంది. నా భార్య చనిపోయి ఐదేళ్లు అవుతోంది. నాకు అన్నం వండిపెట్టడానికి.. భార్యగా ఇంట్లో తోడూనీడగా ఉండేవాళ్లు కావాలి. 45- 50 సంవత్సరాల వాళ్లు కావాలి. అలాంటి వాళ్లు వచ్చి నా వద్ద ఉంటే వారికి సాయం చేస్తా. తిండికి, గుడ్డకూ లోటు లేకుండా చూస్తా. నా ఇద్దరు కొడుకులు దూరంగా ఉన్నారు. ఇంకా ఏవైనా అనుమానాలు ఉంటే నాకు ఫోన్ చేస్తే చెప్తా. నాకు తాగుడు, అల్లరిగా తిరిగే దురలవాట్లు లేవు. ఇష్టం ఉన్నవారు ఎవరైనా నాకు ఫోన్ చేయండి. ” అంటూ నారాయణ చేసిన వీడియో పోస్టు వైరల్ అవుతోంది.

అయితే ఈ వీడియోపై నెటిజన్లు పలు కామెంట్లు చేస్తున్నారు. తాతగారు అడిగిన విధానం బాగుందని.. భార్య చనిపోయి వృద్ధాప్యంలో ఒంటరిగా జీవించడం నరకమని కొంత మంది అభిప్రాయపడుతున్నారు. తనకు తోడూ నీడగా ఉండేందుకు సోషల్ మీడియాను ఎంచుకోవటాన్ని అభినందిస్తున్నారు. వృద్ధ్యాప్యంలో భాగస్వామి దూరమై.. ఒంటరితనంతో ఇబ్బంది పడేవారు చాలా మంది ఉంటారని.. సమాజం ఏమనుకుంటుందో అనే భయంతోనే చాలా మంది కాలం వెళ్లదీస్తుంటారని మరికొందరు అభిప్రాయపడుతున్నారు. అలాంటి వారికి ఈ పెద్దాయన స్ఫూర్తిగా నిలిచారని కామెంట్లు చేస్తున్నారు.

భార్యాభర్తల్లో భర్త ముందు చనిపోతే.. భార్య తట్టుకోగలుగుతుంది. పిల్లల దగ్గరకు వెళ్లి.. మనవళ్లు, మనవరాళ్ల ఆలనాపాలన చూస్తూ, ఇంటి పనుల్లో కోడలికి సాయంగా ఉంటూ మిగతా జీవితాన్ని గడిపేస్తుంది. కానీ పురుషులు మాత్రం తమ పిల్లల దగ్గరికి వెళ్లి, వారితో కలవలేకపోతున్నారు. అలవాటైన పల్లెటూరు వాతావరణాన్ని విడిచిపెట్టి నగరాలకు వెళ్లేందుకు వారు పెద్దగా ఇష్టపడటం లేదు. ఏళ్ల తరబడి భార్య మీద ఆధారపడిన వారు కాస్తా.. ఆమె లేని లోటును దిగమింగుకొని మొండిగా బతకడాన్ని అలవాటు చేసుకుంటున్నారు. అయితే ఒంటరితనం వారిని తీవ్రంగా ఇబ్బంది పెడుతుంది. దీంతో చాలా మంది తమ బాధను ఎవరితో చెప్పుకోలేక తమలో తామే కుమిలిపోతుంటారు. నారాయణ లాంటి అతికొద్ది మాత్రం ధైర్యం చేసి తమకు ఓ తోడు కావాలని చెబుతున్నారు.