హైదరాబాద్ వనస్థలిపురం సాహెబ్‌నగర్‌కు చెందిన క్రాంతి యువజన సంఘం ప్రతి ఏటా వినాయక చవితి వేడుకలు నిర్వహిస్తున్నారు. వీరు ప్రతి ఏటా వినాయకుడిని ఏర్పాటు చేసి.. అనంతరం నిమజ్జనం చేయడానికి ఏదో ఒక పుణ్యక్షేత్రానికి వెళ్లడం సెంటిమెంట్‌‌గా భావిస్తున్నారు. ఇలా క్రాంతి యువజన సంఘం తమ ప్రత్యేకతను చాటుకుంటున్నారు. ఈ ఏడాది కూడా వారు అలాగే చేశారు.. హైదరాబాద్ నుంచి వినాయక విగ్రహాన్ని దుర్గమ్మ కొలువై ఉన్న విజయవాడ తీసుకెళ్లి నిమజ్జనం చేయాలని నిర్ణయం తీసుకున్నారు.

ఈ మేరకు క్రాంతి యువజన సంఘం సభ్యులు దాదాపు 30 మందికి మంగళవారం తెల్లవారుజామున 4:30కి హైదరాబాద్ వనస్థలిపురం నుంచి బయల్దేరి వెళ్లారు. వారంతా మధ్యాహ్నానికి విజయవాడ చేరుకున్నారు.. అనంతరం అందరూ కలిసి ప్రకాశం బ్యారేజీ దిగువన కృష్ణానదిలో వినాయక విగ్రహాన్ని తీసుకెళ్లారు.. అక్కడ విజయవాడ నగరపాలక సంస్థ ఏర్పాటు చేసిన క్రేన్‌ సాయంతో వినాయకుడ్ని కృష్ణమ్మ ఒడిలోకి పంపింంచారు. అనంతరం వారంతా కలిసి దుర్గమ్మను దర్శనం చేసుకున్నారు. దాదాపు 15 ఏళ్లుగా ప్రతి ఏటా వీరు వినాయక నిమజ్జనానికి పుణ్యక్షేత్రాలకు వెళుతున్నారు.. భద్రాచలం, నాగార్జునసాగర్, శ్రీశైలం, విజయవాడ వంటి చోటికి తీసుకెళ్లి నిమజ్జనం చేస్తున్నారు. అనంతరం వారు అక్కడ ఆలయాలకు వెళ్లి దర్శనాలు చేసుకుంటున్నామని తెలిపారు. వీరు మాత్రమే కాదు చాలామంది ఇలానే చేస్తున్నారు.