వాహనదారులకు బిగ్ అలర్ట్.. 9 టెస్ట్‌లు పాసైతేనే ఫిట్‌నెస్ సర్టిఫికెట్.. కంప్యూటర్‌ బేస్డ్ పరీక్షలు

పాత వాహనాల ఫిట్‌నెస్ విషయంలో మరిన్ని కఠిన చర్యలు తీసుకునేందుకు తెలంగాణ సర్కార్ రెడీ అయింది. ఇప్పటివరకు మ్యాన్యువల్‌గా ఆర్టీఓలు తనిఖీలు చేసి.. పాత వాహనాలకు ఫిట్‌నెస్ సర్టిఫికెట్లు జారీ చేసేవారు. ఇక నుంచి కంప్యూటర్ ద్వారా వాహనానికి పరీక్షలు నిర్వహించనున్నారు. 9 రకాల పరీక్షలు పాస్ అయిన వాహనాలకు మాత్రమే.. ఫిట్‌నెస్ ఇవ్వనున్నారు. ఇందుకోసం రాష్ట్రవ్యాప్తంగా 37 ఏటీఎస్ స్టేషన్‌లను ఏర్పాట్లు చేసేందుకు చర్యలు చేపట్టారు.

Vehicle Fitness Certificate

వాహనదారులకు బిగ్ అలర్ట్.. 9 టెస్ట్‌లు పాసైతేనే ఫిట్‌నెస్ సర్టిఫికెట్.. కంప్యూటర్‌ బేస్డ్ పరీక్షలు(ఫోటోలు- Samayam Telugu)
పాత కాలం చెల్లిన వాహనాలతో రోడ్లపై కాలుష్యం విపరీతంగా పెరిగిపోతోంది. దీనికి తోడు పాత వాహనాల నుంచి వచ్చే శబ్ధం, రోడ్డు మధ్యలో మొరాయించి ఆగిపోవడం, ఇతర ప్రమాదాలకు కారణం అవుతుండటంతో.. వాటి విషయంలో తెలంగాణ సర్కార్ కీలక నిర్ణయం తీసుకుంది. లైఫ్ టైమ్ అయిపోయిన వాహనాలకు జారీ చేసే ఫిట్‌నెస్ సర్టిఫికెట్ విషయంలో మరిన్ని కఠిన నిబంధనలు తీసుకువచ్చారు. రవాణా శాఖ అధికారులు ఇక నుంచి మ్యాన్యువల్‌గా పరీక్షలు నిర్వహించకుండా.. కంప్యూటర్ బేస్డ్ టెస్ట్‌లను నిర్వహించి.. అందులో పాస్ అయితేనే వాహనాలకు ఫిట్‌నెస్ సర్టిఫికెట్లు జారీ చేసేందుకు చర్యలు చేపట్టారు.

ఈ క్రమంలోనే తెలంగాణలో ఆటోమేటెడ్ టెస్టింగ్ స్టేషన్లు (ఏటీఎస్) ఏర్పాటు చేసేందుకు రవాణా శాఖ కసరత్తులు ముమ్మరం చేసింది. వచ్చే వారం రోజుల్లో టెండర్లను పూర్తి చేసేందుకు రెడీ అయింది. రాష్ట్రవ్యాప్తంగా 37 ఏటీఎస్‌లను ఏర్పాటు చేసేందుకు ఇప్పటికే ప్రణాళికలు సిద్ధం చేసింది. రాష్ట్రంలోని ప్రతీ జిల్లా కేంద్రంలో ఒక ఏటీఎస్ ఏర్పాటు చేయనున్నారు. హైదరాబాద్ మెట్రోపాలిటన్ రీజియన్‌లో అదనంగా 4 స్టేషన్లను ఏర్పాటు చేయాలని భావిస్తోంది. ఈ ఏటీఎస్‌లు ఏర్పాటైతే ఫిట్‌నెస్ సర్టిఫికెట్ ఉంటేనే వాహనాలు రోడ్డెక్కనున్నాయి.

బైక్‌లు, ఆటోలు, కార్లు, లారీలు, జేసీబీలు వంటి ఎలాంటి వాహనాలకైనా ఫిట్‌నెస్‌ సర్టిఫికెట్లు తప్పనిసరిగా ఉండాలి. ఇప్పటివరకు మ్యానువల్‌గా జారీ చేసిన ఫిట్‌నెస్ సర్టిఫికెట్ల స్థానంలో ఏ వాహనాన్ని అయినా ఆటోమేటెడ్‌గా టెస్ట్ చేసి ఫిట్‌నెనెస్ సర్టిఫికెట్లు అందించే సరికొత్త విధానాన్ని తీసుకురానున్నారు. రోడ్లు భవనాల శాఖ ద్వారా మొత్తం రూ.296 కోట్లతో పనులు చేపట్టేందుకు రాష్ట్ర ప్రభుత్వం 2024 సెప్టెంబర్ 30వ తేదీన జీఓ నంబర్ 28కు పరిపాలనా అనుమతులు ఇచ్చింది. కానీ టెండర్లు పూర్తి కాకపోవడంతో అది పెండింగ్‌లో పడింది. తొలి దశలో15 చోట్ల ఏటీఎస్‌లను ఏర్పాటు చేస్తామని.. ఉమ్మడి జిల్లా కేంద్రాల్లో ఒకటి.. జీహెచ్ఎంసీ, హెచ్ఎండీఏ పరిధిలో మిగిలినవి ఏర్పాటు చేయనున్నారు. 2024-2025 ఆర్థిక సంవత్సరంలో తెలంగాణ ప్రభుత్వం 37 ఏటీఎస్‌లకు ప్రాథమిక రిజిస్ట్రేషన్ సర్టిఫికేట్లను జారీ చేసినట్లు ప్రకటించింది.

ఇప్పటిదాకా మోటారు వెహికిల్‌ ఇన్‌స్పెక్టర్లు నామమాత్ర తనిఖీలు చేసి ఫిట్‌నెస్ పత్రాలు ఇచ్చేవారు. దీంతో ప్రమాదాలు చోటు చేసుకునేవి. ఏటీఎస్ రాకతో పరిస్థితి పూర్తిగా మారనుంది. వాహనదారులు మొదట ఆన్‌లైన్‌లో ఫీజు చెల్లించి స్లాట్ బుక్ చేసుకుంటే.. ఏటీఎస్‌లో కంప్యూటర్ బేస్డ్ టెస్ట్‌లకు పంపిస్తారు. ఏటీఎస్‌లో 9 రకాల టెస్ట్‌లను నిర్వహించి.. తొలుత పొల్యూషన్ టెస్ట్ చేస్తారు.

టైర్లు సరిగా ఉన్నాయో లేవో చెక్ చేసేందుకు రెండో పరీక్షగా స్లిప్‌టెస్ట్‌ చేస్తారు. షాక్ అబ్జర్వర్లు ఎలా ఉన్నాయో పరీక్షించనున్నారు. ఆ తర్వాత మూడో పరీక్షగా స్పీడ్ టెస్ట్ చేస్తారు. మోటారు వాహనాల చట్టం ప్రకారం.. వాహనాన్ని తయారు చేసిన సంస్థ చెప్పిన హరన్‌ను మాత్రమే ఉపయోగించాలి. ఈ క్రమంలోనే 4వ పరీక్షగా హారన్ టెస్ట్‌ చేస్తారు. ఐదో పరీక్షగా బ్రేక్‌లను అత్యాధునిక టెక్నాలజీ డివైజ్‌లతో చేపడతారు.

అండర్ పిట్ ఇన్‌స్పెక్షన్‌గా ఆరో పరీక్ష.. ఏడో పరీక్షగా జాయింట్ ప్లే టెస్ట్ చేస్తారు. చివరిగా 9వ పరీక్షగా హెడ్‌లైట్లను టెస్ట్‌ను ప్రత్యేక పరికరాలతో నిర్వహిస్తారు. ఏటీఎస్‌లో టెస్ట్‌ల వివరాలు మొత్తాన్ని వాహన్ వెబ్‌సైట్ సర్వర్‌లో అప్‌లోడ్‌ చేస్తారు. ఫిట్‌నెస్ సర్టిఫికెట్ జారీ చేసేందుకు కేంద్రం నిర్దేశించిన ప్రమాణాలు, విలువలతో పోల్చి చూస్తుంది. అన్నీ సరిగ్గా ఉన్నాయని తేలితే కంప్యూటర్ ఆటోమేటిక్‌గా వాహనాన్ని అప్రూవ్ చేస్తోంది. ఏటీఎస్ ఫిట్‌నెస్ టెస్ట్‌లో ఎలాంటి లోపాలు చోటు చేసుకోవు. వాహనం సరిగ్గా ఉంటే 22 నిమిషాల్లోనే ఫిట్‌నెస్ సర్టిఫికెట్ జారీ చేస్తారు.