పవన్ సారూ.. మాకు రోడ్డు వేయండి.. మీకు దండం పెడతాం.. గోతిలోకి దిగిన విద్యార్థులు

పవన్ సారూ.. మాకు రోడ్డు వేయండి.. మీకు దండం పెడతాం.. గోతిలోకి దిగిన విద్యార్థులు

Vizianagaram Students Request to Pawan kalyan For Road:

పవన్ కళ్యాణ్ సారూ.. మాకు రోడ్డు వేయండి.. చదువుకుంటామంటూ కొంతమంది విద్యార్థులు వినూత్న నిరసన తెలుపుతున్న వీడియో సోషల్ మీడియాలో వైరల్ అవుతోంది. విజయనగరం జిల్లాకు చెందిన కొంతమంది విద్యార్థులు తమ ఊరికి రోడ్డు వేయాలంటూ.. గోతిలోకి దిగి వేడుకుంటున్నారు. మెడలో పవన్ కళ్యాణ్ ఫోటోలు వేసుకుని.. డిప్యూటీ సీఎం సారూ.. మాకు రోడ్డు వేయండి అని అభ్యర్థిస్తున్నారు. ఈ వీడియో సోషల్ మీడియాలో ప్రస్తుతం వైరల్ అవుతోంది.

Students request to pawan kalyan for Road

రోడ్డు కోసం గోతిలో దిగి విద్యార్థుల విజ్ఞప్తి

సోషల్ మీడియా మాధ్యమం.. అది రెండు వైపులా పదును ఉన్న ఆయుధం.. మంచిగా వాడితే సత్ఫలితాలు.. చెడుకు వినియోగిస్తే అదే రీతిలో పర్యవసనాలు ఉంటాయి. మంచి కోసం ఉపయోగిస్తే సోషల్ మీడియా ద్వారా అసాధ్యాలను ఎలా సుసాధ్యం చేయవచ్చో.. ఆపదలో ఉన్న ప్రాణాలను ఎలా కాపాడవచ్చో తెలియజేసేందుకు చిన్నారి పునర్విక ఘటనే ఉదాహరణ. ఇదే స్ఫూర్తితో సోషల్ మీడియా ద్వారా తమ సమస్యలు, ఇబ్బందులకు పరిష్కారాలు దొరుకుతాయని ఎంతో మంది ముందుకు వస్తున్నారు. అలాంటిదే ఓ వీడియో సోషల్ మీడియాలో ప్రస్తుతం వైరల్ అవుతోంది. రోడ్డు వేయండి సారూ.. చదువుకుంటామంటూ రేపటి పౌరులు.. గోతిలో దిగి వేడుకుంటున్న వీడియో నెట్టింట వైరల్ అవుతోంది.

విజయనగరం జిల్లా ఎస్. కోట మండలం దారపర్తి పంచాయతీలోని గిరిజన విద్యార్థుల వ్యధ ఇది. చదువుకోవటానికి బడికి వెళ్లేందుకు నిత్యం 12 కిలోమీటర్లు కొండ ఎక్కి, దిగాల్సి వస్తోందని విద్యార్థులు వాపోతున్నారు. మీకు దండం పెడతాం.. మాకు రోడ్డు వేయండి డిప్యూటీ సీఎం సారూ.. అంటూ వేడుకుంటున్నారు. తమ విజ్ఞప్తి డిప్యూటీ సీఎం పవన్ కళ్యాణ్ వరకూ చేరేందుకు విద్యార్థులు వినూత్నంగా ఆలోచించారు. రోడ్డు కోసం గోతిలోకి దిగి.. మెడలో డిప్యూటీ సీఎం పవన్ కళ్యాణ్ ఫోటోలు మెడలో వేసుకుని ‘డిప్యూటీ సీఎం సార్ మాకు రోడ్డు వెయ్యండి.. మీకు దండం పెడతాం’ అంటూ కోరుతున్నారు ఈ గిరిజన విద్యార్థులు. తమ సమస్యకు పవన్ కళ్యాణ్ పరిష్కారం చూపాలని కోరుతున్నారు. చదువుకుంటాం సారూ.. రోడ్డు వేయండి అంటూ వేడుకుంటున్నారు. ఈ వీడియో ప్రస్తుతం సోషల్ మీడియాలో వైరల్ అవుతోంది.

మరోవైపు సోషల్ మీడియా ద్వారా తన దృష్టికి వచ్చే సమస్యలపై డిప్యూటీ సీఎం పవన్ కళ్యాణ్ వేగంగా స్పందిస్తూ ఉంటారు. గతంలోనూ అనేకసార్లు ఇలా తన దృష్టికి వచ్చిన అంశాలపై స్పందించి.. వారి సమస్యను పరిష్కరించారు కూడా. నెల్లూరు జిల్లాలోని కొండాపురం మండలం గజ్జలవారిపల్లికి చెందిన కొంతమంది విద్యార్ధులు సరైన రోడ్డు సౌకర్యం లేక పాఠశాలకు వెళ్లేందుకు ఇబ్బందులు పడుతున్నామంటూ ఇటీవల ఓ వీడియో సోషల్ మీడియాలో షేర్ చేశారు.

ఈ విద్యార్థుల వేదన పవన్ కళ్యాణ్‌ను కదిలించటంతో.. వెంటనే ఆ ఊరికి రోడ్డు మంజూరు చేయించారు డిప్యూటీ సీఎం. 1.6 కిలోమీటర్ల మేరకు రోడ్డు నిర్మాణం కోసం రూ. 86 లక్షల అంచనాలతో శాంక్షన్ ఆర్డర్ ఇచ్చేలా పవన్ కళ్యాణ్ చర్యలు తీసుకున్నారు. ఇప్పుడు ఈ విద్యార్థుల సమస్యకు కూడా అలాగే పరిష్కారం చూపితే బాగుంటుందని నెటిజన్లు కోరుతున్నారు.