మేయర్‌, డిప్యూటీ మేయర్ జీతమెంతో తెలుసా..? కౌన్సిలర్లకు అందే జీతభత్యాలు ఇవే..

తెలంగాణ మున్సిపల్ ఎన్నికల ప్రక్రియ పూర్తిగా.. మేయర్‌, డిప్యూటీ మేయర్ జీతాల విషయంపై ప్రస్తుతం చర్చ జరుగుతోంది. కౌన్సిలర్లకు, కార్పొరేటర్లకు కూడా ప్రభుత్వం జీతాలు చెల్లిస్తుంది. అయితే అవి ఎంత అనేది చాలా మందికి తెలియదు. ఈ కథనంలో వారి జీతభత్యాలతో పాటు, విధులను కూడా తెలుసుకుందాం.

హైలైట్:

మేయర్‌, డిప్యూటీ మేయర్

వారికి జీతమెంతో తెలుసా..?

కౌన్సిలర్లకు అందే జీతభత్యాలు ఇవే..

Telangana mayor salary

తెలంగాణలోని కార్పొరేషన్లు, మున్సిపాలిటీల్లో కొత్త పాలక వర్గాలు కొలువుదీరాయి. 7 కార్పొరేషన్లకు మేయర్లు, డిప్యూటీ మేయర్ల ఎన్నిక జరగ్గా.. 105 మున్సిపాలిటీల్లో ఛైర్‌పర్సన్లు, వైస్‌ఛైర్మన్ల ఎన్నిక సోమవారం జరిగింది. మరో 11 చోట్ల ఎన్నిక వాయిదా పడింది. ఈ విషయం అటుంచితే ఈ ఎన్నిక కోసం అభ్యర్థులు భారీగా ఖర్చు చేశారు. కొన్ని చోట్ల అయితే ఓటుకు రూ.70 వేలు, బంగారం, వెండిని కూడా బహుమతులుగా ఇచ్చినట్లు తెలిసింది. మరి ఇంత ఖర్చు పెడితే వారికి జీతభత్యాలుంటాయా..? ప్రభుత్వం నుంచి వారికి అందే సౌకర్యాలేంటి..? వారి విధులేంటో తెలుసుకుందాం.

కొత్తగా ఎన్నికైన మేయర్లు, డిప్యూటీ మేయర్లు, ఛైర్‌పర్సన్లు, వైస్‌ఛైర్మన్లకు గౌరవ మర్యాదలతోపాటు అధికారాలు, బాధ్యతలున్నాయి. రాష్ట్రపతి, ప్రధాని ఇతర ప్రముఖుల పర్యటనలు, కార్యక్రమాల సందర్భంగా నగర, పట్టణ ప్రథమ పౌరులుగా వారికి ప్రొటోకాల్‌లో మొదటి స్థానం ఉంటుంది. దాంతో పాటు నగరపాలికల్లో మేయర్‌కు జీతాలు, వెహికల్ భత్యాలుంటాయి. సిబ్బంది సేవలను కూడా వినియోగించుకోవచ్చు. మేయరుకు నెలకు రూ.65 వేల జీతం ఉంటుంది. డిప్యూటీ మేయర్‌కు 32,500, కార్పొరేటర్‌కు రూ.7,800 ప్రతి నెలా జీతంగా వస్తుంది.

పురపాలక ఛైర్‌పర్సన్లకు కూడా వేతనాలున్నాయి. జనాభా 50 వేల దాటిన మున్సిపాలిటీల్లో ఛైర్‌పర్సన్లకు రూ.19,500 ప్రతి నెలా జీతంగా అందుతుంది. డిప్యూటీ ఛైర్‌పర్సన్లకు రూ.9,750 చొప్పున, కౌన్సిలర్లకు రూ.4,550 చొప్పున జీతాలుంటాయి. జనాభా 50 వేల కంటే తక్కువ గల మున్సిపాలిటీల్లో ఛైర్‌పర్సన్లకు రూ.15,600 ప్రతి నెలా జీతంగా అందుతుంది. డిప్యూటీ ఛైర్‌పర్సన్లకు రూ.6,500, కౌన్సిలర్లకు రూ.3,250 చొప్పున జీతాలు చెల్లిస్తారు.

నగరపాలికలు, మున్సిపాలిటీల్లోని పాలకవర్గం పారిశుద్ధ్య పర్యవేక్షణ, రోడ్లు, డ్రైనేజీల నిర్మాణం, వీధిదీపాల నిర్వహణ, ప్రజల ఫిర్యాదుల పరిష్కారం, మొక్కలు నాటడం, తాగునీటిని సరఫరా చేయడం, పన్ను వసూలు, రుణాల చెల్లింపు వంటి బాధ్యతలు నిర్వర్తించాల్సి ఉంటుంది. పాలకవర్గ సమావేశాలకు మేయర్‌, ఛైర్మన్ అధ్యక్షత వహించాలి. నెలకు కనీసం ఒకసారి ఈ సమావేశాన్ని ఏర్పాటు చేయాలి. మేయర్, ఛైర్‌పర్సన్లు లేని సమయంలో డిప్యూటీ మేయర్, వైస్‌ఛైర్‌పర్సన్ల అధ్యక్షతన పాలకవర్గ సమావేశాలు జరుగుతాయి.