ఏదో తూతుమంత్రంగా నడిస్తే సరిపోదు, డాక్టర్ లెక్క ప్రకారం బరువు తగ్గడానికి ఎలా వాకింగ్ చేయాలో తెలుసా?

ఈ రోజుల్లో అందరూ ఫిట్‌గా కనిపించాలని కోరుకుంటారు. బరువు తగ్గడం, బొడ్డు కొవ్వును తగ్గించడం చాలా మందికి ఫిట్‌నెస్ లక్ష్యం. ఈ లక్ష్యం బరువు తగ్గించడమే కాదు మంచి ఆరోగ్యాన్ని కూడా ఇస్తుంది. బరువు తగ్గడానికి రెగ్యులర్ వాకింగ్ బెస్ట్ ఆప్షన్. రోజూ నడవడం వల్ల చాలా కేలరీలు బర్న్ అవుతాయి. ఇది మానసిక, శారీరక ఆరోగ్యాన్ని కూడా మెరుగుపరుస్తుంది. దాదాపు ప్రతి ఒక్కరూ వాకింగ్ చేయవచ్చు. ఏ వయసు వారైనా సరే దీన్ని ఈజీగా చేయవచ్చు.

రెగ్యులర్ వాకింగ్ చేయడం వల్ల శరీరంలో పేరుకుపోయిన కొవ్వు తగ్గుతుంది. దీంతో జీవక్రియ వేగవంతం అవుతుంది. ఒక కిలోమీటర్ నడవడం వల్ల 100 నుంచి 200 కేలరీలు ఖర్చవుతాయి. గురుగ్రామ్‌లోని మారెంగో ఆసియా హాస్పిటల్‌లోని డయాబెటిస్ ఊబకాయం జీవక్రియ రుగ్మతల క్లినికల్ డైరెక్టర్ అండ్ హెడ్ డాక్టర్ పరాస్ అగర్వాల్ ఎలా నడిస్తే బరువు తగ్గుతారో చెప్పారు. ఆయన ప్రకారం బొడ్డు కొవ్వును విసెరల్ ఫ్యాట్ అంటారు. ఇది హార్మోన్ల అసమతుల్యత వల్ల జరుగుతుంది. క్రమం తప్పకుండా వాకింగ్ చేయడం వల్ల బెల్లీ ఫ్యాట్ తగ్గుతుంది. డాక్టర్ ఏ రూల్స్ చెప్పారో తెలుసుకుందాం.

శరీరం ముందు నడకకు అలవాటు పడేందుకు వేగాన్ని సాధారణంగా ఉంచండి. నడక నుంచి గరిష్ట ప్రయోజనాల్ని పొందడానికి కొన్ని విషయాల్ని గుర్తించుకోవడం చాలా ముఖ్యం. మీ భంగిమను సరిగ్గా ఉంచుకోవాలి. నడుస్తున్నప్పుడు ఎల్లప్పుడూ వీపును నిటారుగా, భుజాల్ని సడలించి ఉంచాలి. చూపు ముందుకు, అడుగులు దూరంగా పడేలా ఉండాలి.

నడవడానికి మంచి నాణ్యత గల బూట్లు అవసరం. మీరు సరైన బూట్లు ఎంచుకుంటే, పాదాలు, మోకాళ్ల నొప్పులు ఉండవు. మంచి షూస్ ధరిస్తే సులభంగా నడవగలరు. బూట్ల పరిమాణం చిన్నగా లేదా టైట్‌గా ఉన్న షూస్ ధరించి నడవడం వల్ల ఎన్నో సమస్యలు వస్తాయి. పాదాల నొప్పి వస్తుంది. మోకాళ్ల నొప్పులు కూడా వస్తాయని డాక్టర్ అంటున్నారు.

ప్రారంభంలో 20 నుంచి 30 నిమిషాలు నడిచిన తర్వాత, మీరు ప్రతి వారం సమయాన్ని క్రమంగా 5 నుంచి 10 నిమిషాలు పెంచాలి. మీరు 3 కిలోమీటర్లు నడుస్తుంటే, వచ్చే వారం 4 కిలోమీటర్లు, ఆ తర్వాత వారం 5 కిలోమీటర్లు నడవడానికి ప్రయత్నించండి.

భోజనం చేసిన వెంటనే నిద్రపోయే బదులు, కొంతసేపు నడవండి. తిన్న తర్వాత చాలా వేగంగా నడవకండి. 15 నుంచి 20 నిమిషాలు తక్కువ వేగంతో నడవడం వల్ల జీర్ణక్రియ సజావుగా సాగుతుంది. బరువు తగ్గడానికి, మీ జీవనశైలిలో వాకింగ్‌ను భాగం చేసుకోండి. మీరు కనీసం ఐదు రోజులు నడవడం వల్ల మంచి ఫలితాలుంటాయి. నడకతో పాటు, స్క్వాట్స్, పుష్-అప్స్, తేలికపాటి వెయిట్ లిఫ్టింగ్ కూడా చేయండి. వారానికి కనీసం 2-3 రోజులు యోగా లేదా స్ట్రెచింగ్ చేయండి. శరీరాన్ని టోన్ చేయడానికి, కార్డియోతో పాటు కండరాలను బలపరిచే వ్యాయామాలు చేయండి.