Warangal News : బడా బకాయిదారుల లిస్ట్ రెడీ, పన్ను కట్టని షాపులు సీజ్

Warangal News : గ్రేటర్ వరంగల్ పరిధిలో ట్యాక్స్ వసూళ్లపై బల్దియా ఫోకస్ పెట్టింది. ఇంకో రెండు నెలల్లో ఆర్థిక సంవత్సరం ముగియనుండగా.. ఇంతవరకు సగం కూడా పన్ను వసూలు పూర్తి కాలేదు. దీంతో ఆర్థిక సంవత్సరం ముగిసే లోగా పన్నులు క్లియర్ చేయించేలా బల్దియా కసరత్తు చేస్తోంది. ఈ మేరకు బకాయిలు పేరుకుపోయిన బడా దుకాణదారుల సమాచారాన్ని తయారు చేయించి, ముందుగా వారిపై యాక్షన్ తీసుకునేందుకు అధికారులు రెడీ అవుతున్నారు. అంతేగాకుండా ఏళ్లుగా ట్యాక్స్ లు కట్టని వాళ్లపై చర్యలకు సిద్ధమయ్యార

రెండేళ్లుగా పెండింగ్.. షాప్ సీజ్

పన్నుల వసూళ్లపై దృష్టి పెట్టిన అధికారులు ముందుగా మొండి బకాయిల లిస్ట్ రెడీ చేశారు. ఏళ్ల తరబడి ట్యాక్స్ కట్టకుండా నిర్లక్ష్యం చేస్తున్నవారికి ముందుగా నోటీసులు జారీ చేసి, అయినా స్పందించని పక్షంలో కఠిన చర్యలు చేపట్టేలా యాక్షన్ తీసుకుంటున్నారు. ఇందులో భాగంగానే బుధవారం వరంగల్ నగరంలోని ఓ షాప్ ను సీజ్ చేశారు. లష్కర్ బజార్ కు చెందిన ఇండియన్ టెర్రయిన్ అనే షాప్ నిర్వాహకులు రెండేళ్లుగా పన్ను చెల్లించకుండా నిర్లక్ష్యంగా వ్యవహరిస్తున్నారు. వసూలు కోసం వెళ్లిన సిబ్బందికి ఏదో ఒక సాకు చెబుతూ తప్పించుకుంటున్నారు. ఈ మేరకు షాప్ కు సంబంధించిన రెండు సంవత్సాల ట్యాక్స్ పెండింగ్ లో పడింది. ఈ నేపథ్యంలోనే కొద్దిరోజుల కిందట బల్దియా సిబ్బంది మరోసారి సంబంధిత యజమానులను సంప్రదించారు. స్పందన లేకపోవడంతో నోటీసులు జారీ చేసి, పన్నులు చెల్లించాలని కోరారు. ఆ తరువాత కూడా వారి నుంచి సరైన సమాధానం లేకపోవడంతో రెడ్ నోటీస్ కూడా జారీ చేశారు. అయినా కూడా ఫలితం లేకపోవడంతో విషయాన్ని గ్రేటర్ కమిషనర్ షేక్ రిజ్వాన్ బాషా దృష్టికి తీసుకెళ్లారు. అనంతరం ఆయన ఆదేశాల మేరకు మున్సిపల్ యాక్ట్–2019 ప్రకారం ఇండియన్ టెర్రయిన్ షాప్ నకు రూ.80,448 పెనాల్టీ విధించడమే కాకుండా అధికారుల ఆదేశాలను బేఖాతరు చేయడంతో షాప్ ను సీజ్ చేశారు. సకాలంలో పన్నులు చెల్లించకపోతే మున్సిపల్ యాక్ట్ ప్రకారం కఠిన చర్యలు తీసుకుంటామని గ్రేటర్ కమిషనర్ షేక్ రిజ్వాన్ బాషా హెచ్చరించారు.