Pesara Punugulu: నూనె పీల్చుకోని.. క్రిస్పీ పెసరపప్పు పునుగులు..
- Political News
reddys talk
- 0
- 2 minutes read
ఉదయం అల్పాహారంలోకి పెసరపప్పుతో చేసే పునుగులు ప్రయత్నించి చూడండి. నూనెలో డీప్ ఫ్రై చేయాలని భయపడక్కర్లేదు. కొన్ని టిప్స్ పాటించి చేస్తే నూనె చాలా తక్కువగా పీల్చుకుంటాయి. ఈ పెసర పునుగుల్ని రుచిగా ఎలా తయారు చేసుకోవాలో పక్కా కొలతలతో తెల్సుకోండి.
కావాల్సిన పదార్థాలు:
ఒకటిన్నర కప్పుల పొట్టు పెసరపప్పు
4 పచ్చిమిర్చి
అంగుళం అల్లం ముక్క
గుప్పెడు కొత్తిమీర తరుగు
తగినంత ఉప్పు
డీప్ ఫ్రై కి సరిపడా నూనె
తయారీ విధానం:
- ముందుగా పెసరపప్పును శుభ్రంగా కడుక్కుని 1 నుంచి 2 గంటల పాటూ నానబెట్టుకోవాలి. ఎక్కువ సేపు నానబెడితే పునుగులు నూనె ఎక్కువగా పీల్చుకుంటాయని మర్చిపోవద్దు.
- మిక్సీ జార్లో పెసరపప్పు నీళ్లు లేకుండా వేసుకుని అల్లం ముక్క, పచ్చిమిర్చి ముక్కలు, ఉప్పు, కొత్తిమీర తరుగు కొద్దిగా వేసుకుని మిక్సీ పట్టుకోవాలి.
- పిండిని మరీ మెత్తగా కాకుండా బరకగా ఉండేలా చూసుకోవాలి. దాంతో పునుగులు క్రిస్పీగా వస్తాయి. పిండి పట్టేటప్పుడు నీళ్లు వేసుకోకుండానే పట్టడానికి ప్రయ్నత్నించాలి. అవసరమైతే రెండు మూడు చెంచాల నీళ్లు మాత్రమే వాడాలి.
- ఈ పిండిని ఒక గిన్నెలోకి తీసుకుని మళ్లీ కాస్త కొత్తిమీర, సన్నగా తరుగుకున్న ఉల్లిపాయ ముక్కలు వేసుకుని బాగా కలుపుకోవాలి.
- పిండి పలుచగా అనిపిస్తే ఒక చెంచా బియ్యం పిండి కలుపుకోవచ్చు. పిండి ఎక్కువగా కలిపితే పునుగులు కాస్త గట్టిగా వస్తాయని మర్చిపోవద్దు.
- ఇప్పుడు కడాయిలో నూనె పోసుకుని బాగా వేడెక్కాక మంట మీడియం మీద ఉంచి చిన్న చిన్నగా పునుగులు వేసుకోవాలి. బాగా రంగుమారాక టిష్యూ పేపర్ మీద తీసుకోవాలి.
- వేడివేడి పునుగుల్ని పల్లీ లేదా కొబ్బరి చట్నీతో సర్వ్ చేస్తే చాలా బాగుంటాయి.
