Karthika Amavasya: రేపే కార్తీక అమావాస్య తిథి, ప్రాముఖ్యతతో పాటు ఈరోజు ఏమేం చేయాలో తెలుసుకుందాం

Karthika Amavasya: కార్తీక అమావాస్య తిథి పితృపూజకు అత్యంత పవిత్రమైన రోజు. ఈ రోజు పూర్వీకులను ఆరాధిస్తే వారి ఆత్మకు శాంతి కలుగుతుంది. దేవతలు, పూర్వీకుల ఆశీస్సులతో పాటు అదృష్టం వరించాలంటే ఈ రోజు చేయాల్సిన పనులు కొన్ని ఉన్నాయి.

హిందూ మతంలో ప్రతి నెలా వచ్చే అమావాస్య తిథికి ప్రత్యేక ప్రాముఖ్యత ఉంటుంది. ప్రతి ఏడాది కార్తీక మాసంలో వచ్చే అమావాస్య రోజుకు విశేష పవిత్రత ఉంటుంది. ఈ సారి నేడు రేపు అంటే నవంబరు 30, డిసెంబర్ 1 తేదీలలో కార్తీక అమావాస్య తిథి వచ్చింది. ఈ రోజు ప్రత్యేకంగా దీపాలు వెలిగించడం, పూజలు చేయడం, వ్రతాలు ఆచరించడం అత్యంత శుభప్రదంగా భావిస్తారు. కార్తీక మాసంలో వచ్చే ఆఖరి రోజు కావడంతో ఈ రోజు చేసిన పూజలు, ఉపవాసాలు నెల మొత్తం చేపట్టిన పూజలతో సమానమని పెద్దలు చెబుతున్నారు.

సాధారణంగా కార్తీక అమావాస్య రోజున పూజలు, వ్రతాలు నిర్వహిస్తారు. పుణ్యక్షేత్రాలలో లేదా నదులలో స్నానం చేయడం చాలా ప్రాచీన సంప్రదాయం. గంగా, యమున, కృష్ణ, భద్రాచలం వంటి నదుల్లో స్నానం చేసేందుకు హిందువులు వెళ్ళవచ్చు.ఈ రోజున మీ ఇంట్లో దీపాలు పెట్టడం ముఖ్యం. ఇది శుభాలను, ధనాన్ని ఆకర్షించడమే కాకుండా, దుష్టశక్తుల నుంచి రక్షణ కలిగిస్తుందని విశ్వసించబడుతుంది. ఈ రోజున పితృసంకల్పం చేసి తర్పణం చేయడం ద్వారా పితృమూర్తుల్ని పూజిస్తారు. పితృ సంస్కారాలు, పితృశాంతి పూజలు చేయడం అనేది మంచి ఫలితాలను అందిస్తుంది. కార్తీక అమావాస్య రోజున ధ్యానం, ఉపవాసం వంటివి శ్రద్ధగా చేయడం వల్ల ఆత్మ, శరీర శుద్ధి అవుతుందని నమ్మిక. పైగా కార్తీక మాసం నాడు చేపట్టే ఉపవాస ఫలం నేరుగా పితృదేవతలకు చెందుతుందట. ఈ రోజు, సనాతన ధర్మం గ్రంథాలను చదవడం లేదా శ్లోకాలు పఠించడం మంచిదని కూడా చాలా పురాణాల్లో ప్రస్తావించారు. ఇంట్లో దీపారాధన చేస్తున్న సమయంలో విష్ణు సహస్ర నామం, లక్ష్మీదేవి అష్టోత్తర నామం చదవాలి.