YCP Sitting MLAs Issue: వైసీపీ సిట్టింగ్ ఎమ్మెల్యేలకు ఝలక్ ఇవ్వనున్న జగన్!

శ్రీకాకుళం నుంచి తిరుపతి వరకు అన్ని జిల్లాల్లో దాదాపు 50మంది సిట్టింగ్ ఎమ్మెల్యేలకు ఈ సారి పోటీ చేసే అవకాశం లభించకపోవచ్చని వైసీపీ వర్గాలు చెబుతున్నాయి. మంత్రి వర్గ సమావేశం ముగిసిన తర్వాత ఎమ్మెల్యేలను నేరుగా పిలిపించుకుని ఈ విషయాన్ని వారికి తెలియ చేసే అవకాశాలున్నాయి. ఇతర మార్గాల్లో సమాచారం లీక్ కావడంతోనే మంగళగిరి ఎమ్మెల్యే ఆర్కే, గాజువాక ఇంచార్జి రాజీనామాలు చేసినట్టు తెలుస్తోంది.

గెలిచే అవకాశాలు లేని వారితో మొహమాటానికి పోయి తెలంగాణ మాదిరి ప్రతికూల ఫలితాలు ఎదుర్కోవాల్సి వస్తుందనే ఆలోచన వైసీపీ అధినేతలో ఉంది. ప్రస్తుత క్యాబినెట్‌లో ఉన్న ఇద్దరు మంత్రులను వారి జిల్లా నుంచి పొరుగు జిల్లాలో పోటీ చేయించే అవకాశాలున్నాయి. తిరుపతి జిల్లా నుంచి లోక్‌సభకు ప్రతినిధ్యం వహిస్తున్న ఎంపీ, ఎమ్మెల్యేల స్థానాలు తారుమారు కానున్నాయి. ఎంపీ గురుమూర్తిని అసెంబ్లీకి, మంత్రి నారాయణ స్వామిని పార్లమెంటుకు పోటీ చేయించే ఆలోచన ఉన్నట్టు సమాచారం.

మంత్రులు ఆదిమూలపు సురేష్‌‌ను పార్లమెంటుకు, మేరుగు నాగేశ్వరరరావును ప్రకాశం జిల్లా నుంచి పోటీ చేయించనున్నారు. మాజీ మంత్రి మేకతోటి సుచరితకు కూడా స్థాన చలనం తప్పదని తెలుస్తోంది. పినిపె విశ్వరూప్‌ తన కుమారుడికి అవకాశం ఇవ్వాలని కోరుతున్నా ఆయన్నే మళ్లీ పోటీ చేయాలని ఆదేశించే అవకాశాలున్నాయి. సుధాకర్ బాబు, హెన్రీ క్రిస్టినా వంటి వారికి ఇతర నియోజక వర్గాల బాధ్యతలు అప్పగించే అవకాశాలు ఉన్నాయి.కృష్ణా, ఎన్టీఆర్‌ జిల్లాల్లో అభ్యర్థుల్ని మార్చే ఆలోచనలో ఉన్నట్టు తెలుస్తోంది.