Vegetarians in India: మన దేశ జనాభాలో ఎంతమంది శాఖాహారులున్నారో తెలుసా? ఇదిగో కొత్త నివేదిక

మొదట స్థానం మనదే

శాకాహారులు అత్యధికంగా ఉన్న దేశాల జాబితాను రూపొందించింది వరల్డ్ అట్లాస్. ఆ నివేదిక ప్రకారం శాకాహారులను అత్యధికంగా కలిగి ఉన్న దేశం మనదే. భారతదేశ జనాభాలో 38 శాతం మంది పూర్తి శాకాహారులుగా ఉన్నట్టు గుర్తించారు. అలాగే ప్రపంచవ్యాప్తంగా మాంసాన్ని తక్కువగా వినియోగిస్తున్న దేశం కూడా మనదే. తాజా నివేదిక ప్రకారం శాకాహారుల సంఖ్య పెరగడానికి ఆర్థికపరమైన అంశాలు, మాంసం పట్ల పెరిగిన వ్యతిరేకత, నమ్మకాలు, మతం… వంటివన్నీ ప్రభావం చూపించవచ్చని చెబుతున్నారు అధ్యయనకర్తలు.

ఇక భారతదేశం తర్వాత శాకాహారులను అధికంగా కలిగి ఉన్న దేశం ఇజ్రాయిల్. ఇజ్రాయిల్ జనాభాలో 13 శాతం మంది శాకాహారులుగా ఉన్నారు. ఇజ్రాయిల్‌లో శాకాహారులు పెరగడానికి కారణం ‘జుడాయిజం’. ఈ మతపరమైన జీవనశైలి కారణంగానే ఇజ్రాయిల్‌లో శాకాహారుల సంఖ్య పెరుగుతోంది. ఆ తర్వాతి స్థానాల్లో తైవాన్, ఇటలీ ఉన్నాయి. ఈ రెండు దేశాల్లో కూడా శాఖాహారాలు తినే వారి సంఖ్య అధికంగానే ఉంది.

గుండెకు మేలు

శాకాహారం తినడం వల్ల ఎన్నో ప్రయోజనాలు ఉన్నాయని ప్రపంచంలో ఎంతోమంది నమ్ముతున్నారు. అందుకే మాంసాహారం పై విముఖత పెరుగుతూ వస్తున్నట్టు గుర్తించారు. శాకాహారం తినడం వల్ల గుండె ఆరోగ్యం మెరుగ్గా ఉంటుంది. రక్తపోటు తగ్గుతుంది.. దీనివల్ల గుండె జబ్బుల ప్రమాదం కూడా తగ్గుతుంది. రక్తనాళాల్లో కొలెస్ట్రాల్ పేరుకుపోయే సమస్య ఉండదు.